مشكلتى إنى راجل

منذ عدة سنوات، شاهدت مقطع فيديو على اليوتيوب تقريباً .. وكان يحكى عن فكرة غريبة ... الفكرة ان مجموعة من اللصوص الملثمين والمسلحين اقتحموا بنك .. وطبعا كانوا يريدون أن يسرقوا الفلوس .. فكان كل فرد منهم كان يحاول جمع الفلوس، واحد منهم كان اسمه أيمن (اسم مستعار) كان بياخد الفلوس من بنت، والبنت دى كانت بنت بجد (يعنى) امورة وحلوة وشابه . أيمن خد الفلوس منها، وخلصوا العملية بنجاح ، وكلهم ماشيين . بص أيمن لأصحابه وطلب منهم انهم يستنوا نص دقيقة، راح أيمن للبنت وكتب على كارت اسمه ورقم تليفونه وطلب منها تقابله أو تكلمه! وفى أخر المقطع، كتبوا جملة غريبة اوى

(( لا تلوم الرجل كونه رجلاً ))

كم حد فينا ممكن يتهم (أيمن) بانه غبى لانه كشف نفسه وكشف هويته ؟؟
الراجل دا (مش غبى) لانه ببساطة استطاع ان يخترق الامن والعساكر والجدار الامنى .... لانه قدر ينفذ العملية بنجاح، لكن بنت كانت السبب فى انه يقع، وبنت كانت السبب ان معظمنا يتهمه بالغباء، وبنت هى السبب اللى ممكن يخليه يقضى كل حياته فى السجن !
حكاية (أيمن) هى حكاية كل شاب وكل رجل ..العين والشهوة، ووجود البنت أو المرأة .. التاريخ والكتاب المقدس فيهم حكايات بتحكى عن سقوط رجال جبابرة بسبب بنت أو مرأة فكلنا نعرف قصة شمشون ودليلة .. دليلة التى قادت شمشون لنقطة الصفر. وكتير من الرجال اللى نعرفهم .... حصل معاهم قريب من اللى حصل لشمشون(البطل الخارق). وقبل أن يتبادر فى ذهنك او فى فكرك انى عدو المرأة (فدا غير صحيح بالمرة) .
طب ايه المشكلة ؟
المشكلة صديقى ليست العين .. ولا هى البنت أوالمرأة.. ((المشكلة ببساطة إنى راجل)) .. والمشكلة الحقيقية اننا لا نعرف أن نتعامل مع كوننا رجال... بالفعل لا نعرف أن نتعامل مع كوننا رجال ... لكن كيف نتعامل مع كوننا رجال ؟؟؟ إِنَّ كُلَّ مَنْ يَنْظُرُ ... لِيَشْتَهِيَ... فَقَدْ زَنَى ... فِي قَلْبِهِ (كلام وعظ) يا جماعة انا نفسى ابطل اشوف وابطل أشتهى وأبطل أزنى فى قلبى بس مش عارف أعمل دا !!!طب عيش زى ما أنت .. هتعمل ايه ؟ .. دى طبيعة الراجل بيحب من نظره (كلام احباط) يا جماعة انا نفسى أتغير !!! كثير مننا أختبر التغيير فعلاً . (يعنى فى حاجة ممكن تغيرنى) .. الحاجة دى مش الوعظ صدقنى لاننا اتهرينا وعظ ... التغيير هو انك تبقى راجل...

الراجل هو من يدرك نفسه ويعرف طبيعته :

الراجل الحقيقى يعرف انه مش بطل خارق لكنه ببساطة ممكن يسقط فى الخطية، لأن البطل الخارق بيسقط فى الخطية عادى، صديقى لازم تعرف اننا خطاة واستعددنا للخطية سهل جداً، لأنى بالخطية حبلت بى أمى.

من يهرب من الخطية :

قصة يوسف الصديق وهروبه من الخطية تجعلك تحس انه بجد راجل ، اما من يتهاون مع الخطية فمن المؤكد انها طرحت كثيرين جرحى وكل قتلها أقوياء.

من يعترف بخطيته :

فإن وقعت فى الخطية، فلا تتجاهلها أو تتركها وتصبح (تشرب الإثم كالماء) لكن اعترف بها أمام الله، وامام مرشد روحى (أب كاهن او قسيس أو قائد) ولا تنسى أن تصلى معه وتصدق ما سيقولهُ لك.

من لديه مبادئ :

على مر التاريخ جاء رجال عظماء ومع مرور الوقت أكتشف الناس أنهم لم يكونوا عظماء؛ وهذا بسبب انهم باعوا مبادئهم فى فترة من الفترات، من يعيش بالمبادئ ويحاول أن لا يتنازل عنها مهما كان ، لا يفارقه النجاح والثقة بالنفس.

من لديه قضية يعيش لها :

هم الذين يُحدثُون التغير فى التاريخ، لكن أن تعيش وأنت لا تملك غير أنك تُرضى أهوائك وشهواتك وميولك فأنت لا تختلف كثيراً عن المجتمع، لكن أبحث عن هدف تعيش له مثلما فعل مارتن لوثر كينج والإنهاء على التفرقة العنصرية، أيضا فعل نيلسون مانديلا كذلك، قد يكون هدفك علمى او اجتماعى او رياضى أو روحى ، عليك أن تبحث وأن تعيش لتلك القضية.

من يقود نفسه ويقود من حوله :

خلق الله الرجل ليكون رأس المرأة ولكى يقود زوجته وأسرته، لذا إن استطاع الرجل أن يقود نفسه أولاً ، سيستطيع حتماً أن يقود بيته وزوجته بالحب والحكمة والتضحية.

تعليقات

هههههه، و هذا سبب آخر لفهم لماذا يغرق العالم في الدجل و الحروب، لانه حضرة الرجال متصدرين للسلطات، بدءا من الاسرة الى غاية رئاسة الدول، و رجال لا يتحكمون في غرائزهم و شهوتهم، كيف سيتحكمون في العالم بحكمة و نبل، أكيد حيخربطوا الدنيا، تحية للرجال الذين خربوا العالم بسبب شهواتهم.

Ray
2/27/2019 8:52:00 PM

فعلا مشكلتى أنا وكتير من أصحابى اننا رجاله . وزى ما بيقولوا الراجل بيحب ويقغ من عنيه !!! لكن انتوا بتتكلموا عن مفهوم الرجولة الصحيح . ربنا يبارككم وياريت تصلوا من أجلى .

New Boy
7/25/2012 2:33:00 AM