البنت - الكائن الغريب - موقع لمسات شافية

البنت - الكائن الغريب

فى وسط القاهرة

فى يوم الجمعة الصبح كنت واقف فى وسط البلد وكنت مستنى محل يفتح، بصيت حواليا يمين وشمال، ورجعت أبص تانى يمين وشمال، الشارع مفيش فيه ولا واحده ولا بنت!!
قررت اركز يمين وشمال وابص بعيد .. معقووول .. معقول المخلوق دا مش موجود خالص!! والغريب كل الناس اللى حواليا ولاد !!
وبعد مرور 10 دقائق لقيت بنت ظهرت فى الشارع ...ما هذا الكائن الذى ظهر ؟؟؟ هل أنا أحلم ؟؟؟ ما هذا الكائن الذى يقترب منى ؟؟ وما هذه اللغة الفصحى التى استخدمها ؟؟

فى حياتنا

حسيت من قلبى اننا كشباب بننظر للبنت على انها كائن غريب لكن السؤال اللى بسأله وهفضل اسأله .. هو ليه لما بنت بتبقى ماشيه فى الشارع اللى انا وانت ماشيين فيه .. ليه كل الناس بتبص عليها ؟؟ (شكلها – جسمها – لبسها – مشيها –كلامها) وكأن هى مخلوق غريب !! بالظبط زى اللى بيحصل لما واحد امريكى ينزل قرية من قرى مصر المحروسة، تلاقى كل اللى فى القرية بيبصوا عليه ... ليه ؟؟؟ ببساطة لانه غريب ياريت كل حد يرد على السؤال دا .. ليه الولاد بيبصوا على البنات ؟؟ يمكن المشكلة تكون فى البنات ... يمكن تبقى تربية الولاد (كلهم) ... يمكن المشكلة فى المجتمع الشرقى بتاعنا ... يمكن الولاد بتدور على بنت الحلال (حتى لو الولد عنده 13 سنه) ... يمكن.... يمكن .........! لكن الاكيد... ان البنت كائن غريب جدا !!

فى الواقع

صديقى ..الكائن الغريب دا هو أمى وأختى وأختك وعيلتى وقرايبك .! دا ميبقاش كائن غريب ولا حاجة .. امال ايه الغريب ؟؟
الغريب انك تتعامل مع البنت على انها سلعة !! او على انها أداة جنسية !! أو على انها كائن غريب !!! هى تستحق الاحترام .. عندها عقل .. مبدعة .. لها شخصيتها .. هى كائن لكنه مش غريب .
لازم تدرك إن البنت شخصية زيك، ليها طموحاتها وأحلامها ومخاوفها، ليها شخصيتها المستقلة، بتفكر بعقلها ومبدعة وقادرة على التغيير فى التاريخ.

فى الكتاب المقدس

.. مكتوب فى سفر التكوين الاصحاح 2 وعدد18 وقال الرب الاله ليس جيدا ان يكون ادم وحده. فاصنع له معينا نظيره هى مش كائن غريب هى نظيرى .....
أخيرا سؤالى ليك صديقى ... أصدقائك بيبصوا للبنت ازاى ؟؟ وهل فعلا بيعتبروها كائن غريب ؟