٥ طرق تساعد الجيل الجديد انهم يتبعوا المسيح
كتابنا انهاردة هو
Faith for Exiles: 5 Ways for a New Generation to Follow Jesus in Digital Babylon
تأليف: David Kinnaman & Mark Matlock
الكتاب دا بيقول إن إحنا جيل بيعيش في زمن مش سهل خالص
إحنا عايشين في حاجة اسمها
Digital Babylon
– زي بابل زمان اللي كان فيها كل حاجة مغرية، مليانة آلهة كتير، ومحدش كان بيقدر يسمع صوت ربنا وسط الزحمة
النهاردة بابل بقت
إنستجرام اللي بيقارنا بغيرنا
يوتيوب اللي بيعلمنا كل حاجة إلا الإيمان
تيك توك بيدينا دوبامين اكتر من الصلاة
ودماغنا اللي بقت مشغولة ٢٤/٧ لدرجة إن ربنا بقى على الهامش
المشجع إن الكاتب ادانا خمسة مفاتيح للإيمان في الزمن ده
المفتاح الأول: علاقة حقيقية بشخص يسوع مش بمجرد تعليم
كتير من الناس مؤمنين بـالمسيحية، لكن مش عارفين المسيح
يعني بنعرف عنه، بس ما نعرفوش
بيتكلم عن فئة سماها
المرشدين الروحيين الرقميين
اللي بقوا بياخدوا مكان الكنيسة
مؤثرين على تيك توك، بودكاست والمسئولين اللي بيصورا الاحداث وهمهم اللقطة
عشان كده سيب المرشدين دول ودور علي علاقة حقيقية مع المسيح
المفتاح التاني: عيش ضد التيار بس بحكمة مش بخوف
مش معناها تعزل نفسك، لكن تعيش قيمك بوعي
يعني تبقى جوه العالم، بس مش نسخة منه
زي دانيال وهو في بابل – عاش هناك، اتعلم هناك، لكن قلبه كان لربنا
وده مش سهل، بس تقدر تعمله
المفتاح التالت: فهم الإنجيل كحكمة حياتية، مش معلومات
الجيل الجديد بيحب يفكر، يسأل، يشك، وده مش عيب
لكن احيانا الكنيسة بتدي إجابات محفوظة
الكتاب بيشجعنا نعيد اكتشاف الإنجيل كنضاارة نفهم بيها العالم، مش بس واجب روحي نخلصه
المفتاح الرابع: مجتمع حقيقي مش تجمّع ديني
الكنيسة احيانا بتحسس الشباب إنهم لازم يلبسوا قناع عشان يتحبوا
لكن المسيح نفسه كان بيحب الناس في ضعفهم
عشان كده محتاجين نكون جزء من جماعة إيمان صغيرة، صادقة، بتسند بعض بجد، مش بتقارن ولا تحكم
المفتاح الخامس: عيش رسالتك في العالم، مش بعيد عنه
كتير من الشباب فاكر إن دعوة ربنا يعني تبقى خادم أو كاهن
لكن الدعوة الحقيقية ممكن تكون في الطب، التصميم، التجارة، السوشيال ميديا
كلنا مدعوين نعيش الإنجيل من خلال شغلنا وحياتنا، مش بعيد عنها