امستردام (هولندا): الشارع الأحمر
في جولتنا انهارده حول العالم، هنروح مكان حلم لكل شاب طايش (يعني كلام في سرك حلم ليك ولي)، يلا بينا نربط الاحزمة ونركب الطيارة، ونروح امستردام في هولندا.
اول لما تقول امستردام، هيجي في ذهنك كذا مكان آثري وعظيم زي متحف فان جوخ والقصر الملكي والمتحف البحري ومتحف امستردام وكمان متحف الشمع. كل اللي فات أماكن روعة نزورها ونستمتع بيها. لكن زي ما قولتلك في الاول امستردام فيها مكان لأي حد طايش. يلا نروح الشارع الأحمر.
الشارع الأحمر (دي فالين) عشان في شارعين تاني بس مستواهم قليل: الشارع الأحمر دا من اسمه كده باين انه مكان صعب، الشارع دا شارع طبيعي زي اي مكان لحد الساعة 11 بليل، في الوقت دا الاضواء الحمرا بتشتغل تدريجيا، ونشوف السياح بيظهروا ويكتروا ويزيدوا. (شايفك يا خلبوص وانت نفسك تروح معاهم). المهم بتستمر الحركة في الشارع وبيوت الدعارة لحد الساعة 3 بعد نص الليل بعد كده الأضواء الحمرا بتقل تدريجيا والبيوت بتقفل.
تاني حاجة في الشارع دا أو في امستردام عامة، المخدرات مباحة للدرجة انك تقدر تشتري البذور اللي منها تقدر تزرع المخدرات في بيتك (انت متخيل) محلات بتبيع شيكولاتة بالحشيش وشاي بالحشيش وبسكويت بالحشيش ولبان بالحشيش ومصاصة بالحشيش (يعني لو انت اشتريت مصاصة من دول واديتها لطفل صغير تخيل بقى الدماغ اللي هيعملها). من الآخر بيسميها بعض الناس انها مدينة الخطية.
الشارع دا والمدينة دي بيفكروني بحاجة مهمة جدا.
في الكتاب المقدس عرفنا مدينة شبه الشارع دا، سدوم وعمورة. في تك 18 : 20 مكتوب صُرَاخَ سَدُومَ وَعَمُورَةَ قَدْ كَثُرَ وَخَطِيَّتُهُمْ قَدْ عَظُمَتْ جِدّا.
في العالم وفي حياتنا اليومية: بنعيش في مدينة وفي شارع زي الشارع الأحمر دا. شارع بيشتغل بليل في وقت معين. شارع بلاقي الأمان في إدمان عادة معينة أو مخدرات معينة أو علاقة معينة.
الكتاب المقدس جاي يفكرني اني مش محتاج الشارع الأحمر في حياتي. الإدمان هو إهانة لأعظم مكان خلقه ربنا. إهانة للجسد. في 1 كو 6 : 19 مكتوب. أَمْ لَسْتُمْ تَعْلَمُونَ أَنَّ جَسَدَكُمْ هُوَ هَيْكَلٌ لِلرُّوحِ الْقُدُسِ الَّذِي فِيكُمُ، الَّذِي لَكُمْ مِنَ اللهِ، وَأَنَّكُمْ لَسْتُمْ لأَنْفُسِكُمْ.
في النهاية احنا حكينا عن امستردام اللي فيها الشارع الأحمر، اللي مليان بناس كتيرة مدمنة للمخدرات والجنس، لكن الكتاب المقدس كمان بيفكرنا اننا نمجد الله في أجسادنا مكتوب لأَنَّكُمْ قَدِ اشْتُرِيتُمْ بِثَمَنٍ. فَمَجِّدُوا اللهَ فِي أَجْسَادِكُمْ وَفِي أَرْوَاحِكُمُ الَّتِي هِيِ للهِ. وفي الآخر عايز اقولك على حاجة. بلاش امستردام يا اخي، وبلاش الشارع الأحمر، وبلاش نيجي للحتة دي تاني.