عازفي تيتانك في كندا
في جولتنا انهارده حول العالم، هنروح مكان بعيييييييد شويتين تلاتة، (يعني للأسف هنتعب في السفر)، يلا بينا نربط الاحزمة ونركب الطيارة، ونروح كندا.
اول لما تقول كندا، هيجي في ذهنك شلالات نياجرا، واللي بتعتبر أطول شلالات في العالم وهي بين كندا وامريكا، لكن كمان كندا، فيها بحيرة مورين أو الحطام ودي واحدة من أجمل المعالم السياحية المائية حول العالم، كمان فيها برج سي إن تورينتو واللي طوله 553 متر. ممكن كمان تروح لمدينة تشرتشل وهي مدينة صغيرة لكنها تحفة، هناك يا معلم تقدر تشوف الدببة القطبية (انت متخيل) يلا بينا نتمشى اكتر في كندا ونروح مدينة اسمها نيو فندلاند.
نيو فندلاند أو لابرادور مكان ساحلي تحفة، تقدر تشوف الطبيعة والمنحدرات الساحلية والوديان العميقة والمستنقعات والبحيرات والغابات الكثيفة. بس انا عايز اعمل زوم ان شوية كده على مدينة نيو فندلاند دي، المدينة دي سنة 1912 حصلت فيها كارثة كبيرة، مات بسببها أكتر من 1500 شخص، في واحده من اسوء الكوارث البحرية اتخبطت سفينة في جبل تلج ودا تسبب في غرق السفينة تيتانك.
فيلم تيتانك واللي تم انتاجه سنة 1997 صور مشهد غريب وقت غرق السفينة، المشهد عبارة عن فرقة عزف وهي بتعزف وقت الخراب والغرق. طبعا المشهد دا نال من السخرية كتير اوي.
بس المذهل في الأمر، إن الفرقة دي حقيقي عملت كده. الفرقة دي كان فيها العازفين دول كلارك وتايلور وكرينس وهارتلي وبرايلي وهيوم و وودوارد وبريكو. 8 عازفين قرروا يكونوا ثابتين وسط العواصف. لأ قرروا يكونوا ثابتين. وهما بيموتوا بيعملوا دورهم. على فكرة أنا قلت أسمائهم لأن الناس دول يستحقوا التكريم فعلا.
في الكتاب المقدس شفت مشهد شبه عازفين تيتانك، في أعمال الرسل واصحاح 7 مكتوب عن استفانوس اللي وقت ما كان بيترجم، كان ممتليء من روح الله وكان بيصلي ان الله يسامح اللي بيقتلوه.
الكتاب المقدس جاي يفكرني اني اكون ثابت وسط العواصف في مز 27 : 3 مكتوب إِنْ نَزَلَ عَلَيَّ جَيْشٌ لاَ يَخَافُ قَلْبِي. إِنْ قَامَتْ عَلَيَّ حَرْبٌ فَفِي ذلِكَ أَنَا مُطْمَئِنٌّ. انت متخيل الآيه دي جيش نازل يحاربني انا وحدي، لكني متطمن ومش خايف لأن الله معايا. الكتاب المقدس مصدر للطمائنية، مهما الدنيا اتقلبت من حولي ومهما العواصف والامواج عالية هقدر ارنم وأقول اَلرَّبُّ نُورِي وَخَلاَصِي، مِمَّنْ أَخَافُ؟ الرَّبُّ حِصْنُ حَيَاتِي، مِمَّنْ أَرْتَعِبُ؟
في النهاية احنا حكينا عن نيو فندلاند اللي موجودة في كندا، وازاي عازفين سفينة تيتانك كانوا ثابتين وسط العواصف وهما بيعزفوا وبيعملوا دورهم لحد ما ماتوا، وكمان شفنا في الكتاب المقدس إن الله هو مصدر الأمان وهو وحده يخليني ثابت وسط عواصف الحياة. وفي الآخر عايز اقولك على حاجة. تعال انا وانت بقوة نرمي الخوف ورا دهرنا ونعمل الدور بتاعنا حتى لو هموت بعد لحظات.