البرازيل: المسيح الفادي
في جولتنا انهارده حول العالم، هنروح مكان بعيييييييد شوية (هناخد وقت كبير في الطيارة خد بالك)، يلا بينا نربط الاحزمة ونركب الطيارة، ونروح ريو دي جانيرو في البرازيل.
اول لما تقول البرازيل، هيجي في بالك انها اكتر بلد حققت كاس عالم، البرازيل يعني المهارة والابداع الكروي. ومين فينا ميعرفش رونالدو الظاهرة ولا بيبيتو ولا دي نيلسون ولا حتى مارسيلو ونيمار وفينسيوس جونيور.
لكن لما تقول ريو دي جانيرو بقي، هيجي في ذهنك حدائق واماكن فعلا ساحرة. الطبيعة هناك تجنن. كمان ممكن تروح لكنيسة ودير ساو بينتو وملعب الماراكانا الشهير وشواطيء الكوباكبانا، كمان هناك في قمة الشوجر لاف الصخرية واللي بيبلغ ارتفاعها 394 متراً وهي قدام البحر. (انت متخيل). بس استنى بالنسبة لي افضل مكان ممكن تشوفه او تزوره هو تمثال من عجائب الدنيا السبع تمثال المسيح الفادي.
تمثال المسيح الفادي صممه النحات الفرنسي بول لاندويسكي واتبنى من 1922 حتى 1931، التمثال فوق قمة جبل طولها 704 متر. ارتفاع التمثال نفسه في حدود ال 30 متر. التمثال مصنوع من الخرسانة المسلحة و6 مليون بلاطة من الحجر الأملس. المبهر إن التمثال دا بيصور المسيح وهو فاتح ذراعيه. لما بنتكلم عن المسيح، إحنا بنتكلم عن حاجات كتير جداً. المسيح مش مجرد إنسان عادي ولا حتى نبي وبس. لأ، الكتاب المقدس بيعلمنا إن المسيح ده هو الله نفسه اللي جه في صورة إنسان. يعني هو الكلمة اللي صار جسد وعاش بينا على الأرض.
في الكتاب المقدس بيعلن المسيح حقيقة مهمة في يو 10 : 30 لما بيقول أَنَا وَالآبُ وَاحِدٌ.
ناس كتيرة ممكن تسخر من فكرة الله المتجسد، لكن الحقيقة إن التجسد بين أكتر عظمة الله في القوة والقدرة. ايوه الله بالتجسد بين عظمة قدرته. بالتجسد بين الله عظمة محبته لي وليك ولكل البشر. بالتجسد بين الله عظمة رحمته.
في النهاية احنا حكينا عن تمثال المسيح الفادي في ريو دي جانيرو، عايز أقولك صدقني المسيح مكنش مجرد انسان ولا نبي، لكنه هو الله اللي فداني وفداك واللي فاتح ايديه طول الوقت ليك ولي. الله قدم رسالة محبة لكل العالم من خلال تجسده في صورة المسيح على الأرض. يمكن تكون محظوظ في يوم لو سافرت البرازيل مرة وشفت تمثال المسيح الفادي اللي هو من عجائب الدنيا السبعة، لكن انت هتكون محظوظ اكتر لو اتمتعت بشركة وعلاقة مع الفادي طول ايام حياتك.