هل يمكن حل مشكلة الزواج من خلال الزواج بأجنبية.

في البداية الزواج اصبح مشكلة، ومشكلة كبيرة جدا.
يعني لو شاب حاول يتزوج وابتدى يحسب المصاريف ممكن يدفع مثلا 300 ألف جنيه، من غير شقة تمليك، يعني بس مصاريف شبكة وتجهيزات الشقة ومصاريف الفرح والاكل والمعازيم والصور والورد.
للأسف حاجة مُحبطة
الموضوع دا، ممكن يخليك تفكر من الزواج من أجنبية، اجنبية يعني عيون خضر وخدود حُمر وشعور صفر، مش دي الميزة الوحيدة، دا الاجانب مش بيبصوا على الدهب ومش محتاجين لمصاريف فرح وكمان عيلتها مش عايشه في مصر، كمان ممكن تشتغل معاك وتبني البيت طوبه طوبه معاك وانتو الاتنين متزوجين، بعكس المصرية أو العربية بشكل عام مش ممكن يتم الزواج الا بعد ما نشتري الدهب والسوليتير وطقم الجيلي والكاسات والنيش وغسالة الاطباق وغرفتين نوم للاطفال اللي هما لسه مجوش ودولاب للملابس الاقل قيمة ودولاب للملابس الفخمة. وسيراميك وبورسلين ودهات بالكمبيوتر وساتائر بالريموت . لو كل دا محصلش يبقى الزواج فشنك.
فعلا وجهة نظر صحيحة ، والكلام دا يخلي اي شاب يا اما يفكر في الزواج من اجنبية او في الحرام.
دا في ميزة كمان مهمة، وكتير من الشباب بيعملها، دي الزوجة الاجنبية دي ممكن تساعدك انك تهاجر وتعيش في دولة أخرى بمستوى معيشة افضل.
طبعا انا مش ضد الزواج من اجنبية
بس المشكلة الحقيقية .. انت عايز ايه من الزواج ؟
هل غرضك الهجرة ؟ هل غرضك الجنس ؟ هل غرضك الجمال ؟ هل غرضك الاسقرار ؟
اعرف غرضك لأن دا هيساعدك جدا، بس لازم تكون دارس زي المزايا تدرس العيوب
يعني اختلاف الثقافة، المستوى الفكري، الانفتاح، الاستقلالية
كل الحاجات دي ممكن تبوظ اي جوازه.
قبل ما تتجوز محتاج تعرف انت عايز ايه !
قبل ما تتجوز محتاج تفهم اكتر عن الزواج !
قبل ما تتجوز محتاج تصلي كتير، ومحتاج اساس روحي عميق تقدر تقف عليه انت وزوجتك او زوجك.
قبل ما تتجوز محتاج تعرف ان الزواج من اجنبية مش حل. ومش خطوة هتاخدها وبعد كده هتسافر وتنفصل او تطلق او اي اساليب ملتوية.
الزواج له ابعاد نفسية وروحية عميقة، الزواج له اساس
واخيرا كلمة للمُقبلين على الزواج، بلاش المُبالغة في المظاهر والمصاريف الباهظة، واللي ممكن تخليكوا تبدأوا حياتكم مديونين. اهتموا بالاساسيات الروحية والنفسية، واهتموا تبنوا بعض، وعلى المستوى المادي امشوا مع بعض خطوة خطوة واشتروا حاجة حاجة حتى لو بعد الزواج، صدقوني الموضوع دا هيضيف متعة لزواجكما.
لو عايز تسمع رأي الدكتور شادي جورج في موضوع الزواج من اجنبية اسمع 10 دقايق فيها دراما وحوار من د. شادي جورج في اللينك دا
https://bit.ly/2UYNK7d