كيف تصبح فاشلا في ١٤ خطوة عملية
ولو انه سؤال سهل لكن للأسف بكل تأكيد محدش هيعرف يرد على السؤال دا.
عارفين ليه؟؟؟
عشان احنا مبنعرفش ننجح باحتراف ولا نفشل باحتراف، احنا حاجة كده زي اللي بيمسك العصايه من النص. ولا عارفين ننجح اوي ولا نفشل اوي.
وفي مقالتي دي هحاول اركز ازاي نفشل باحتراف.
يلا ورقة وقلم واكتبوا معايا (شيف الشيربيني استايل)
1-النجاح بيحتاج تخطيط، والفشل نفس الفكرة لازم تخطط ليه. لكن بدون تخطيط بتعيش زي ما انت ولا ناجح ولا فاشل.
2-التعلم من الاخطاء بيؤدي للنجاح، والعكس صحيح يعني لما هتكرر الاخطاء هي هي فانت اكيد هتكون فاشل باحتراف، ركز يا معلم وكرر أخطائك هي هي، وبلاش مرة تكرر الخطأ ومرة لأ. ركز.
3-الطموح لازم تقضي عليه تماما. يعني ايه طموح يعني نجاح. لكن المشكلة اننا في مكان كدا ولا هو طموح ولا حتى مفيش طموح. فمن فضلك اقضي على طموحك تماما عشان تفشل صح.
4- الفشل يعني الأخذ فقط، لكن النجاح يعني العطاء أكثر من الأخذ. فركز على الأخذ فقط وإن شاء الله هتفشل لا محالة.
5-اوعى تغير رأيك فنفسك، قول لنفسك انا فاشل انا مقدرش انا فقري. لأن الانسان الناجح بيغير رأيه في نفسه بس للأحلى ،انا أقدر .. انا مبدع .. انا ممتاز.
6- النجاح هو عدة مراحل فشلت فيها قبل كده، عشان تكون فاشل باحتراف بطل تجرب طرق جديدة.
7- من الجنون انك تعمل نفس الشئ كل مرة وتتوقع نتائج مختلفة، خلاص لو عايز تكون ناجح اعمل غير كده، لكن لو فاشل في على وضعك يا نجم.
8- للناجح الدراسة ممتعة، والقراءة بتفتح مدارك العقل وبتغير مفاهيم كتير، طبعا عشان تكون فاشل بلاش تقرا خالص.
9- استمد معلوماتك من شبكات التواصل الاجتماعي لأنها هتعمل على زيادة فشلك، او ممكن من برامج التوك شو، من امثال انا سمعت ان.............إلخ.
10- اوعى تتحمل المسئولية، لأنك لو عملت كده ممكن لا قدر الله تنجح وتورط نفسك.
11- خلى شعارك في الحياة (مفيش فايده) مقولة الزعيم العظيم سعد زغلول.
12-اعمل كل حاجة بتعملها بروتين اوعى تبدع اوعى تفكر عكس طريقة تفكير الناس، لأن اللي بيعملوا كده بينجحوا.
13- صدق في المعتقدات اللي بتساعد على الفشل زي النحس والفقر والتخلف والجهل وعدم التقدير.
14- خلى عندك شماعة دايما تعلق عليها فشلك، عشان منظرك يكون حلو خلى عندك شماعة.... لأ ممكن 4 شماعات.
أخيرا، اتمنى اكون قدمت مساعدة حقيقة لكل انسان عايز يفشل باحتراف.