جزيرة في جنوب افريقيا - والغفران
في جولتنا انهارده حول العالم، هنروح مكان مميز جدا جدا في افريقيا (كلام في سرك انا بحلم ازور المكان دا في يوم من الايام)، يلا بينا نربط الاحزمة ونركب الطيارة، ونروح جنوب افريقيا.
اول لما تقول جنوب افريقيا، هيجي في ذهنك السحر والجمال والروعة الموجودة في الطبيعة، تحس هناك بفن وإبداع ولمسات الله في الكون. بص هناك هتنبهر بكل التفاصيل شواطيء وحدائق وجبال. يعني لو رحت Table Mountain جبل الطاولة او الترابيزة هتشوف مدينة خلابة من فوق الجبل دا، كمان هناك تقدر تزور حديقة كروجر الوطنية، ودي واحده من أكبر حدائق الحياة البرية في العالم وتقدر تشوف فيها الخمسة الكبار الأسد الفيل الجاموس النمر ووحيد القرن. كمان في جنوب افريقيا الشاطيء الذهبي ودا مكان روعة للسباحة وركوب الأمواج. لكن خليني اتكلم معاك بالتحديد عن مكان هناك،
جزيرة روبن: الجزيرة دي موجودة في كيب تاون، يلا بينا نروح على الجزيرة دي ونشوف ايه اللي حصل فيها، مبدئيا كده جزيرة روبن دي تم استعمالها خلال مراحل مختلفة بين القرن ال 17 وال 20 . استعملوها في ايه بقى؟ الجزيرة دي كانت عبارة عن سجن ومستشفى للمرضي الغير مرغوب فيهم اجتماعيا وكقاعدة عسكرية. طبعا لما نقول جنوب افريقيا وجزيرة روبن يبقى لازم نقول نلسون مانديلا. وبسرعة شديدة عايز اعرفك على نيلسون مانديلا، هو مناضل في جنوب افريقيا وكان بيحارب العنصرية، وطبعا مش محتاج اعرفك إن مانديلا اتسجن في الجزيرة دي لمدة 18 سنة من اجمالي 27 سنة سجن في سجون مختلفة. سجن جزيرة روبن كان حبس انفرادي في زنزانة تقريبا 2 متر في 2 متر. (انت متخيل) تقضي 18 سنة من عمرك في المكان دا، والسبب انك عايز مساواة بين البشر وميبقاش فيه تميز عرقي على أساس لون البشرة. تم الإفراج عن نيلسون مانديلا يوم 11 فبراير عام 1990. وهنا قال كلمة مهمة جدا جدا جدا لكل اللي ظلموه قال عندما خرجت من الباب باتجاه البوابة التي ستؤدي إلى حريتي، علمت أنني إذا لم أترك مرارتي وكراهيتي خلفي، فسوف أظل في السجن.
عشان اكون أمين نيلسون مانديلا كان بيحاول بطريقة مسلحة يحرر بلاده، لكنه شاف إن الغفران أقوى من أي سلاح تاني، في مرة قال كده "إن الغفران يحرر النفس، ويزيل الخوف. ولهذا السبب فهو سلاح قوي."
في الكتاب المقدس في كولوسي 3 : 13 مكتوب مُحْتَمِلِينَ بَعْضُكُمْ بَعْضًا، وَمُسَامِحِينَ بَعْضُكُمْ بَعْضًا إِنْ كَانَ لأَحَدٍ عَلَى أَحَدٍ شَكْوَى. كَمَا غَفَرَ لَكُمُ الْمَسِيحُ هكَذَا أَنْتُمْ أَيْضًا.
في النهاية من خلال جزيرة روبن ونيلسون مانديلا والكتاب المقدس بنعرف حقيقة مهمة، الغفران قوي جدا وشيء مهم حقيقي، الغفران مش بس هيريحك، لكنه هيغيرك وتطلع بسببه أقوي وشخص مختلف. الغفران قوته إن مصدره الله. انت فاهمني؟ الغفران عملية صعبة إنك تغفر لحد شتمك أو اتكلم عنك غلط أو ضربك أو قتل حد من القريبين ليك. لكن صدقني الله وحده يقدر يديني ويديك قوة تغفر وتتغير وتغير الواقع اللي بتعيش فيه. زي ما جزيرة روبن في جنوب افريقيا اتغيرت من سجن لمزار سياحي تقدر تزوره لو رحت جنوب افريقيا. يلا.. سلام. ونتقابل الحلقة الجاية في دولة جديدة ومكان جديد حول العالم.